Sálmur 63

Heimir Steinsson
William Henry Monk 1861

Kom, Herra Jesús, kom í skýjum nú,
kalla þú börn þín fram við þrumugný.
Návist þín heilög, alskært máttarorð
afhjúpi fánýt verk og dauða trú.

2 Flekkuðum höndum fórna ég í von:
Fær mér að vörum glóð þíns helga elds,
afmá í kærleik allt mitt rotna líf,
upp vek í réttlæti þinn týnda son.

3 Kom, Herra Jesús, lát mig lifa þér,
lostinn til foldar, reistan við á ný.
Básúnan dynji, Drottinn, heyr mitt óp,
dóm þinnar náðar set í hjarta mér.